Mourinho hefur ekki áhyggjur af meiðslum

Jose Mourinho segist ekki hafa teljandi áhyggjur af meiðslunum sem þeir Michael Ballack og Didier Drogba urðu fyrir í tapinu gegn Werder Bremen í Meistaradeildinni í gærkvöld og á von á því að þeir verði klárir í slaginn gegn Manchester United um næstu helgi.

"Meiðsli Ballack eru ekkert til að tala um. Hann fékk takka í lærið og finnur dálítið til - en það er ekkert um að tala. Sömu sögu er að segja af Drogba, hann fann til í ökklanum en það er ekkert alvarlegt og hann verður klár um næstu helgi," sagði Mourinho og viðurkenndi að hann væri aldrei sáttur við að tapa.

"Ég fagna aldrei tapi en við höfðum bara ekki heppnina með okkur þegar kemur að litlu hlutunum. Þegar öllu er á botninni hvolft er það samt nokkuð vel af sér vikið að vera komnir áfram úr sterkum riðli þegar enn er ein umferð eftir," sagði Mourinho.