Hagvöxtur jókst um 0,6 prósent í Þýskalandi

Hagvöxtur jókst um 0,6 prósent í Þýskalandi, einu stærsta hagkerfi evrusvæðisins, á þriðja fjórðungi ársins miðað við fjórðunginn á undan. Greiningardeild Kaupþing segir u töluvert minni vöxt að ræða en á öðrum ársfjórðungi þegar þýska hagkerfið óx um 1,1 prósent á milli fjórðunga.

Greiningadeildin segir í Hálffimmfréttum sínum í dag að einna helst hafi hægst í byggingariðnaðnum þar í landi en geirinn óx óvenju hratt á öðrum ársfjórðungi og fór vöxturinn úr 6 prósentum í 1 prósent.

Þá segir deildin að eftir dræman vöxt einkaneyslu um langt skeið virðist þýskir neytendur vera að snúa aftur í búðirnar því einaneysla jókst um 0,7 prósent á þriðja ársfjórðungi eftir að hafa dregist saman í fjórðungnum á undan.

Deidlin segir að hluta skýringarinnar megi e.t.v. rekja til þess að neytendur séu að gera innkaup sín áður en virðisaukaskattur verður hækkaður á næsta ári. Önnur ástæða aukinnar neyslu megi jafnframt rekja til bata á þýskum vinnumarkaði en atvinnuleysi þar í landi féll niður í 10,4 prósent í október sem er lægsta mæling síðan í mars fyrir tveimur árum.