Stuttgart í þriðja sæti

Stuttgart smellti sér í þriðja sæti þýsku úrvalsdeildarinnar í knattspyrnu í kvöld með 1-0 sigri á Gladbach. Það var framherjinn Cacau sem skoraði eina mark leiksins og hefur Gladbach aðeins náð í eitt stig í síðustu sjö leikjum sínum. Leverkusen lyfti sér af mesta fallsvæðinu með 3-1 sigri á Cottbus.

Bremen vann góðan sigur á Bielefeld 3-0 í gær þar sem Miroslav Klose skoraði tvö mörk og lagði upp eitt. Bayern krækti í 2-1 sigur á Hamburg þar sem stóllinn er farinn að hitna verulega undir Thomas Doll þjálfara. Þá vann Hannover, lið Gunnars Heiðars Þorvaldssonar, góðan sigur á Mainz 1-0 og heldur áfram að klífa töfluna eftir afleita byrjun.

Schalke situr á toppi deildarinnar með 29 stig eftir að öll liðin hafa leikið 14 leiki. Bremen og Stuttgart koma þar á eftir með 27 stig og Bayern er í fjórða sætinu með 26 stig.