Wal-Mart nemur land á Indlandi

Bandaríska verslanakeðjan Wal-Mart hefur tilkynnt að hún muni opna verslanir á Indlandi á næstunni í samstarfi við indversku verslanasamstæðuna Bharti Enterprises. Verslanakeðjur á Vesturlöndum hafa lengi horft til þessa en möguleikinn opnaðist ekki fyrr en slitnaði upp úr viðræðum bresku verslanakeðjunnar Tesco við Bharti Enterprises fyrir helgi.

Í sameiginlegri tilkynningu frá Wal-Mart og Bharti Enterprises segir, að þær muni kanna saman viðskiptatækifærin í landinu. Sunil Mittal, stjórnarformaður Bharti Enterprises, segir ennfremur að keðjurnar muni opna nokkuð hundruð verslanir á Indlandi undir vörumerki Wal-Mart á næstunni.

Upp úr viðræðum slitnaði á milli Tesco og Bharti í síðustu viku en indverska keðjan hafði sömuleiðis átt í viðræðum við frönsku verslanakeðjuna Carrefour og þýsku keðjuna Metro.

Samvinna Wal-Mart og Bharti Enterprises er geysistórt verkefni, að mati breska ríkisútvarpsins, sem hefur eftir greiningaraðilum að markaðsvirði Wal-Mart muni tvöfaldast við þetta á næstu árum og nema allt að 637 milljörðum bandaríkjadala eða 44,9 milljörðum íslenskra króna árið 2015.