Howard er enn inni í myndinni

Sir Alex Ferguson, knattspyrnustjóri Manchester United, segir að markvörðurinn Tim Howard gæti vel átt framtíðina fyrir sér á Old Trafford þó hann hafi ekki náð að festa sig í sessi hjá félaginu. Howard er lánsmaður hjá Everton um þessar mundir.

"Howard hefur staðið sig vel hjá Everton á lánstímanum og það er það sem við vonuðumst eftir. Hann er markvörður með marga góða kosti eins og hraða og snerpu - og svo skilar hann boltanum mjög vel frá sér. Það eina sem hann hefur vantað er reynsla og hann er að fá hana núna hjá Everton. Ég hef líka rætt við David Moyes (stjóra Everton) og hann er mjög ánægður með piltinn. Það er samt alls ekki útilokað að hann komi aftur til okkar þegar lánstímanum lýkur," sagði Ferguson.