Olíubirgðir jukust í Bandaríkjunum

Greiningardeild Glitnis segir aukna eftirspurn eftir olíu í Bandaríkjunum ásamt ágiskunum manna um að OPEC ríkin samþykki að minnka framleiðslu á fundi sínum þann 14. desember hafa valdið lítilsháttar hækkun á olíumarkaði undanfarna daga.

Deildin segir í Morgunkorni sínu í dag að Bandaríkin séu stærsti kaupandi olíu í heiminum og því sé mikið horft í birgðastöðu og mögulega eftirspurn þar í landi þegar reynt sé að spá fyrir um olíuverð.

Búist er við að OPEC, samtök olíuútflutningsríkja, minnki framleiðsluna um 500 þúsund tunnur á fundinum í desember. Til að setja það í samhengi þá framleiddu ríkin um 2,2 milljónir tunna á dag í októbermánuði.

Í vikulegri skýrslu bandaríska orkumálaráðuneytisins, sem birt var á miðvikudag, kemur fram að olíubirgðir í Bandaríkjunum minnkuðu nokkuð síðustu viku. Þrátt fyrir það eru þær 14% hærri en meðalbirgðir síðustu fimm ára.

OPEC ríkin, sem framleiða um 40% af olíu í heiminum, samþykktu í síðasta mánuði að minnka framleiðslu um 1,2 milljónir tunna vegna aukinnar birgðastöðu og til að bregðast við verðlækkunum á heimsmarkaði. Heildarbirgðastaða í heiminum er 100 milljónir tunna meira nú en fyrir ári síðan samkvæmt upplýsingum frá ráðuneyti olíumála í Saudi Arabíu. Slíkar fréttir gefa til kynna að olíuverð eigi ekki eftir að hækka hratt á næstunni þrátt fyrir að leitnin gæti verið eitthvað upp á við. Greiningardeildin segir eftirspurn alla jafna vera mesta á fjórða og fyrsta fjórðungi ársins.