Frábær ef ég skora - Feitur ef ég skora ekki

Brasilíski framherjinn Ronaldo hjá Real Madrid er orðinn dauðleiður á þeirri umfjöllun sem hann hefur fengið í fjölmiðlum undanfarin ár, en kappinn skoraði tvö mörk fyrir Madrid í Meistaradeildinni í vikunni. Hann hefur ekki átt fast sæti í liði Real Madrid og vitað er að Fabio Capello er ósáttur við líkamlegt ástand framherjans snjalla.

"Ég er alveg hættur að velta mér upp úr því hvað sagt er um mig í blöðunum, enda er það alltaf sama tuggan. Ef ég skora, þá er ég frábær - ef ég skora ekki, er ég feitabolla. Það er ótrúlegt hvað fólk nennir að velta sér upp úr þessu en ég einbeiti mér bara að því að æfa vel og koma mér í form," sagði Ronaldo.