Maccarone væntanlega á förum frá Boro

Ítalski sóknarmaðurinn Massimo Maccarone segist fastlega reikna með því að fara frá Middlesbrough fljótlega og þá væntanlega til heimalandsins. Hann segist hafa átt fund með Gareth Southgate knattspyrnustjóra og ljóst sé að engin not séu fyrir hann hjá úrvalsdeildarliðinu.

Maccarone kom ákaflega lítið við sögu hjá liði Boro á síðustu leiktíð, en í þau fáu skipti sem hann kom inn í liðið - og þá gjarnan í Evrópukeppninni - skoraði hann gríðarlega mikilvæg mörk fyrir liðið.

Hann segist hafa vonast til að fá fleiri tækifæri með liðinu eftir að Southgate tók við stjórnartaumum af Steve McClaren, en svo hafi ekki verið. Þeir hafi átt fund á dögunum þar sem stjórinn hafi gefið það út að Ítalinn væri ekki partur af framtíðaráformum hjá liðinu.