Það þurfa fleiri en Drogba að skora

Steve Clarke, aðstoðarþjálfari Chelsea, segir að Didier Drogba verði að fá meiri hjálp frá samherjum sínum við að skora mörk fyrir liðið. Drogba hefur farið á kostum á undanförnu og skorað ófá sigurmörkin fyrir Chelsea. Ljóst þykir að Clarke var fyrst og fremst að beina orðum sínum til Andrei Shevchenko.

“Mörkin hans Drogba upp á síðkastið hafa verið gríðarlega mikilvæg fyrir okkur. En við vonum að aðrir leikmenn stígi upp á næstunni og skori mörk. Það er ekki gott að reiða sig nánast algjörlega á einn leikmann,” sagði Clarke, en á síðustu tveimur leiktíðum hefur markaskorun dreifst mun jafnara á leikmenn Chelsea. “Við viljum frekar hafa það þannig,” sagði Clarke