Böndin styrkjast

Enn styrkjast böndin milli Kaupþings og fjárfestisins Roberts Tchenguiz, sem nýverið bættist í hóp stærstu hluthafa Exista. Allt lítur út fyrir að auðkýfingurinn, með dyggum stuðningi bankans, muni taka yfir bresku veitingahúsakeðjuna La Tasca sem rekur fjölda veitingastaða víðs vegar um Bretland og í Bandaríkjunum. Stjórn La Tasca mælir nú með að hluthafar samþykki tilboð Tchenguiz og Kaupþings upp á 104,2 milljónir punda, sem nemur tæpum fjórtán milljörðum króna. Áður hafði stjórnin mælt með 102 milljóna punda tilboði Tragus Group, sem er í eigu Blackstone-fjárfestingasjóðsins. Tchenguiz og Kaupþing toppuðu það hins vegar og situr nú hópurinn einn að keðjunni.