Wal-Mart: Leiðandi í dreifingu og tækni

Að öðrum fyrirtækjum ólöstuðum hefur bandaríski verslanarisinn Wal-Mart markað braut á sviði vörustjórnunar í rúm fjörutíu ár. Fyrirtækið hefur staðið sig vel við innleiðingu á upplýsingatækni til að fylgjast með birgðaflæði í vöruhúsum auk þess sem miðlægt dreifikerfi fyrirtækisins þykir til fyrirmyndar. Hafa mörg stórfyrirtæki fetað í fótspor bandaríska risans jafnt hérlendis sem í Evrópu.

Dreifikerfi Wal-Mart er þannig að fyrirtækið hefur byggt upp sínar eigin dreifingastöðvar. Vörur eru keyrðar inn í vöruhús fyrirtækisins í Bentonville í Arkansas í Bandaríkjunum og dreift þaðan áfram til smærri miðstöðva og verslana. Með flutningi á eigin vörum falla niður margir milliliðir, svo sem heildsalarnir. Með því að selja vöruna svo í stórum einingum fæst enn meiri hagkvæmni. Mörg fyrirtæki í smásölugeiranum hafa tekið þetta upp eftir Wal-Mart, svo sem Aðföng, stærsta og fullkomnasta birgða-og dreifingarstöð landsins sem kaupir inn og sér um birgðahald og dreifingu fyrir matvöruverslanir Haga.

Tæknivætt wal-martÁrið 1987 varði Wal-Mart háum fjárhæðum í fjárfestingar á tæknibúnaði til að samtengja allar starfsstöðvar og vöruhús keðjunnar um allan heim. Nýtti keðan sér gervihnetti til að tengjast höfuðstöðvunum í Bentonville. Með þessu móti var hægt að hafa auga með vöruveltu og koma skilaboðum áleiðis á augabragði.

Tækninni hefur fleytt fram og í dag er vörustjórnun í vöruhúsi Wal-Mart í Bentonville sjálfvirkt kerfi sem nemur strikamerkingar á vöru frá þeim þúsundum birgja sem keðjan verslar við. Vörur frá birgjum fara úr flutningabílum inn á rúllubretti sem flytur þær innar í vöruhús Wal-Mart. Annað rafauga nemur þær og flytur þær á sinn stað. Svona gengur ferlið þar til varan endar í hillu verslunar.

En þar með er aðeins hálf sagan sögð því þegar viðskiptavinur kaupir fyrir vöruna er henni rennt framhjá enn einu rafauganu við kassann. Þaðan fara skilaboð um kerfi Wal-Mart og enda á borði birgisins, sem byrjar á ný að senda vörur áleiðis til Wal-Mart. Kerfið er hárnákvæmt og sér til þess, að nokkuð jafnt vöruflæði skapast í vöruhúsum Wal-Mart og verslunum.