Sauðárkrókur ljósleiðaravæddur

Nái markmið Gagnaveitu Skagafjarðar fram að ganga verður Sauðárkrókur að fullu ljósleiðaravæddur árið 2009. Í fréttatilkynningu frá Gagnaveitunni segir að Sauðárkróki hafi verið skipt upp í fjögur verksvæði í drögum að framkvæmdaáætlun; Túnahverfi, Hlíðahverfi, syðribæ og útbæ. Hafist verði handa við Túnahverfi í sumar og áætlað að þar verði öll hús tengd í haust. Því næst verði haldið í Hlíðahverfi, þá syðribæinn og loks útbæinn. Ekki verður látið staðar numið við Krókinn heldur ljósleiðarar lagðir víðar í þéttbýli, eftir því sem aðstæður skapast. Þá er ætlunin að taka þátt í uppbyggingu á háhraðatengingum í dreifbýli Skagafjarðar.

Gagnaveita Skagafjarðar ætlar aðeins að reka ljósleiðaranetið og selja aðgang að því fyrir fasta mánaðarlega upphæð. Aðrir aðilar munu veita þjónustu inn á kerfið, svo sem hefðbundna internetþjónustu, sjónvarpsdreifingu og símaþjónustu.

Gagnaveitan var stofnuð árið 2006. Eigendur hennar eru Sveitarfélagið Skagafjörður, Skagafjarðarveitur, Kaupfélag Skagfirðinga, Byggðastofnun, Fjölnet og smærri aðilar.