Líkur á hagnaði bandarískra flugfélaga

Greiningardeild Landsbankans segir líkur á að nokkur af stærstu flugfélögum Bandaríkjanna muni skila hagnaði á síðasta ári en slíkt hefur ekki gerst frá árinu 2000 eftir mikla lægð. Þá segir deildin mikla umræðu hafa verið um samruna flugfélaganna vestanhafs. Gengi hlutabréfa í móðurfélagi American Airlines hækkaði mikið á fyrsta viðskiptadegi ársins í Bandaríkjunum í dag.

Í Vegvísi greiningardeildar Landsbankans í dag kemur fram að flugiðnaðurinn vestanhafs hafi verið í mikilli lægð allt frá árásunum á tvíburaturnana í New York haustið 2001. Rekstur þeirra hafi batnað hægt og bítandi en þrátt fyrir það hafi þau samanlagt tapað 35 milljörðum króna á árabilinu 2001 til 2005. Síðasta ár var gott hjá flestum flugfélögum að fjórða ársfjórðungi undanskildum vegna hærri viðhaldskostnaðar og meiri seinkana á flugi en búist var við, að sögn deildarinnar. Þá geti verið líklegt að einhver félög komi til með að skila tapi í fjórðungnum.

Þá vitnar greiningardeildin til bandaríska dagblaðsins Wall Street Journal, sem hefur eftir sérfræðingum að margt bendi til þess að samrunar flugfélaga séu álitlegur kostur í dag. Með samruna muni nýting flugsæta batna og skapa meira svigrúm á markaðnum. Þó myndi það einnig hafa í för með sér aukinn kostnað og skuldsetningu sem kæmi niður á hagnaði félaganna, að sögn blaðsins.

Þá segir deildin að AMR, stærsta flugrekstrarfélag í heimi, sem FL Group keypti 6 prósent í undir lok síðasta árs, hafi skilað hagnaði á tveimur fjórðungum á síðasta ári.

Gengi hlutabréfa í AMR hefur hækkað mikið í Bandaríkjunum í dag eða um rúm 8 prósent.