Nýtt lággjaldaflugfélag í Asíu

Auðkýfingurinn Tony Fernandes, forstjóri Air Asia, greindi frá því í dag að lággjaldaflugfélögin Air Asia og Fly Asian Express ætla að stofna nýtt lággjaldaflugfélag, Air Asia X, sem mun sinna millilandaflugi á milli Kína, Indlands og Evrópu frá og með júlí í sumar.

Greint var frá stórum fréttum af félaginu í vikubyrjun og töldu menn, að félagið ætlaði í samstarf við Virgin eða Easyjet. Talsmenn félaganna neituðu hins vegar fréttum þessa efnis.

Að sögn Fernandes verða 20 farþegaflugvélar undir merkjum hins nýja félags og er stefnt að því að hálf milljón farþega fljúgi með Air Asia X fyrsta árið.

Kvisast hefur út að miðaverð frá Malasíu til Lundúna geti verið allt niður í 2,84 pund að leiðina. Það svarar til tæpra 288 íslenskra króna.

Air Asia var stofnaði árið 2001 og flugu tvær vélar undir merkjum félagsins í fyrstu. Þær eru nú 50 talsins og fara á milli áfangastaða í SA-Asíu og Kína. Þá hefur félagið stóraukið flugvélaflota sinna og hefur pantað 100 A320 farþegaþotur frá Airbus til að anna aukinni eftirspurn.Svo getur farið að félagið kaupi allt að 100 þotur til viðbótar.