Beckham lét forsetann heyra það á æfingasvæðinu

David Beckham hefur nú loksins svarað fyrir sig eftir að forseti Real Madrid hraunaði yfir hann í fjölmiðlum síðustu daga og kallaði hann lélegan leikara sem ekkert lið kærði sig um að fá. Beckham svaraði hressilega fyrir sig á æfingasvæði Real í gær og kallaði Calderon lygara fyrir framan alla félaga sína í liðinu.

"Þið eruð lygarar og sögðuð stuðningsmönnum Real Madrid að ég væri búinn að kaupa hús í Los Angeles og væri þegar búinn að skrifa undir samning við félagið. Þetta er lygi og mér og fjölskyldu minni líður mjög vel hérna - við vildum öll vera hér áfram. Félagið, þjálfarinn og liðsfélagar mínir hafa allir komið vel fram við mig, en þið tveir (Calderon forseti og Predrag Mijatovic, yfirmaður knattspyrnumála) hafið brugðist mér á allan hátt og ég mun aldrei sýna ykkur virðingu," hrópaði Beckham á forsetann.