Tvöfalt meira tap hjá Alitalia

Ítalska flugfélagið Alitalia greindi frá því um helgina að áætlað tap fyrirtæksins í fyrra næmi um 380 milljónum evra, jafnvirði rúmra 34 milljörðum íslenskra króna. Þetta er tvöfalt meira tap en flugfélagið skilaði árið á undan. Tap flugfélagsins fram til nóvember í fyrra nemur 197 milljónum evra, tæpum 17,8 milljörðum íslenskra króna.

Ítalska ríkið á rétt tæpan helming í flugfélaginu en hefur í hyggju að selja 30,1 prósent í félaginu með það fyrir augum að bæta efnahag þess. Ríkið stæði þá eftir með um 19 prósenta hlut og hefur lýst því yfir að vilji sé fyrir því að selja hlutina alla.

Síðar í dag mun verða greint frá því hverjir hafa hug á að kaupa hlut ríkisins í flugfélaginu. Talið er líklegt að bandaríski fjárfestingasjóðurinn Texas Pacific og ítalska flugfélagið Air One hafi áhuga á bréfum í félaginu.

Air France-KLM átti í fyrra í samrunaviðræðum við stjórnendur Alitalia í fyrra en sagði næstu skref ekki verða stigin fyrr en ríkið seldi hlut sinn og grynnkað yrði á skuldum þess. Flugfélagið hefur verið á svörtum lista fjármálayfirvalda á Ítalíu vegna slælegrar afkomu þess.