Afkoma Ryanair umfram væntingar

Írska lággjaldafyrirtækið Ryanair skilaði 47,7 milljóna evra hagnaði fyrir skatta á þriðja rekstrarfjórðungi félagsins, sem endaði í desember í fyrra. Þetta jafngildir tæpum 4,3 milljörðum íslenskra króna sem er 30 prósenta aukning á milli ára. Búist var við minni hagnaði vegna síaukins eldsneytiskostnaðar í fyrra.

Á sama tíma árið 2005 skilaði flugfélagið 36,8 milljónum evrum í hagnað, eða tæpum 3,3 milljörðum íslenskra króna.

Tekjur flugfélagsins námu 493 milljónum evra, 44 milljörðum íslenskra króna, á tímabilinu, sem er 33 prósenta hækkun á milli ára.

Fréttaveitan Bloomberg segir Ryanair hafa hækkað ýmis gjöld á farþega á síðasta ári og koma þannig til móts við aukinn rekstrarkostnað vegna hækkunar á eldsneytisverði, svo sem með því að hækkað verð á farmiðum.

Bloomberg segir afkomuna á fjórðungnum langt umfram spár greinenda en meðalspá þeirra hljóðaði upp á 21 milljóna evra hagnað, sem svarar til tæplega 1,9 milljarða íslenskra króna.

10,25 milljónir farþega flugu með vélum Ryanair á síðustu þremur mánuðum nýliðins árs en það er 19 prósenta aukning á milli ára.

Michael O'Leary, forstjóri Ryanair, segist búast við að vegna lægra eldsneytisverðs nú en í fyrra muni hagnaður lággjaldaflugfélagsins aukast frekar. Hann gerir ráð fyrir að hagnaðurinn muni nema allt að 390 milljónum evra, 34,8 milljörðum íslenskra króna, sem er 40 milljónum evrum meira en fyrri afkomuspá flugfélagsins gerði ráð fyrir.