Capello: Beckham hefur verið frábær

Fabio Capello, þjálfari Real Madrid, segir að framkoma og metnaður David Beckham á æfingum Real Madrid síðustu vikur hafi sannfært sig um að enski miðjumaðurinn væri tilbúinn í slaginn með spænska liðinu. Capello segir Beckham hafa hagað sér eins og sannur fagmaður eftir að hafa verið tilkynnt um að hann myndi ekki spila meira í vetur.

"Við höfðum efasemdir um að hann væri 100% með hugann við efnið eftir að hafa skrifað undir samning við bandaríska liðið. En síðan þá hefur hann lagt sig allan fram á æfingum og látið allt fárið hafa lítil áhrif á sig. Hann hefur hagað sér eins og sönnu fagmanni ber og fyrir vikið fær hann aftur tækifæri í hópnum," sagði Capello í dag.

"Ég talaði við hann fyrir viku síðan og aftur í dag. Við erum mjög ánægðir og hann líka," sagði Capello og bætti við að ákvörðunin hefði algjörlega verið hans eigin. Hann hefði ekki verið undir neinni pressu frá stjórnendum Real Madrid né áhangendum félagsins um að velja Beckham í hópinn á ný.