Airbus frestar tilkynningu um hagræðingu

Evrópsku flugvélasmiðirnir hjá Airbus hafa ákveðið að fresta því að tilkynna um fyrirhuguð hagræðingaráform hjá fyrirtækinu. Ástæðan er sú að ekki hafa náðst sættir við dótturfélög Airbus víðs vegar í Evrópu. Óttast er að tugþúsund starfsmenn fyrirtækisins missi vinnuna hjá Airbus.

Tafir á framleiðslu A380 risaþotu fyrirtækisins hafa orðið þess valdandi að afhending á þotunum hefur dregist um tvö ár. Afleiðingarnar hafa meðal annars orðið til þess að nokkur fyrirtæki hafa dregið pantanir sínar til baka auk þess sem hrykkt hefur í stoðum EADS, móðurfélagi Airbus.

Stjórn EADS segir að herða þurfin sultarólina vegna þessa en með hagræðingu í rekstri Airbus er horft til þess að takist að spara fimm milljarða evrur, jafnvirði 438,25 milljarða íslenskra króna, á næstu þremur árum. Þá er horft til þess að aðgerðirnar vegi upp tap og kostnað EADS vegna tafa á framleiðslunni.

Breska ríkisútvarpið segir fjölmiðla gera ráð fyrir að allt frá 12.000 til 57.000 manns muni verða sagt upp í hagræðingarskyni.