Emerson orðaður við AC Milan

Brasilíski miðjumaðurinn Emerson hjá Real Madrid er nú sterklega orðaður við sölu til AC Milan, en hann hefur engan veginn náð sér á strik á Spáni í vetur. Emerson er sagður hafa neitað að spila í sigurleik Real á Bayern Munchen í Meistaradeildinni á þriðjudag og vilja forráðamenn spænska liðsins hann burt.

Emerson var lykilmaður í meistaraliði Juventus í ítölsku A-deildinni í fyrra en fór frá liðinu eftir að það var dæmt niður í B-deildina. Tíminn hjá Real Madrid hefur hins vegar átt mest skylt við martröð því fyrir utan að hafa spilað illa hefur Emerson mátt þola baul og aðrar verri svívirðingar frá stuðningsmönnum liðsins.

Emerson á marga vini hjá AC Milan og hefur verið haft eftir Carlo Ancelotti, þjálfara Milan, að Brasilíumaðurinn sé velkominn á San Siro hvenær sem er.