Ibanez: Real Madrid er lélegt lið

Pablo Ibanez, varnarmaður Atletico Madrid, segist sjaldan hafa séð eins lélega frammistöðu hjá Real Madrid eins og þegar liðin mættust á föstudagskvöld í spænsku úrvalsdeildinni. Ibanez segir með ólíkindum að Atletico hafi ekki náð að vinna leikinn, en hann endaði með 1-1 jafntefli.

“Þetta var versta frammistaða Real Madrid sem ég hef upplifað í langan tíma. Við mættum lélegu liði í þessum leik. Við stjórnum leiknum algjörlega og fengum fullt af færum. Real átti eitt skot að marki og það var jöfnunarmarkið. Óheppni okkar var ótrúleg,” sagði Ibanez eftir leikinn, en hann er augljóslega ekki hrifinn af spilamennsku Real Madrid þessa dagana.