Goðsagnir Man. Utd. dásama Ronaldo

Bobby Charlton og David Beckham, tveir af þekktustu leikmönnum Manchester United frá upphafi, hafa nú bæst í hóp þeirra sem segja Cristiano Ronaldo einfaldlega vera besta leikmann heims um þessar mundir. Báðir eru þeir sammála um að Ronaldo geri hluti sem hafi aldrei sést áður í sögu knattspyrnunnar.

"Hann hefur verið ótrúlegur á þessari leiktíð. Leikmenn geta verið í heimsklassa en það eru aðeins örfáir sem ná að fanga athygli allra á vellinum með snilli sinni. Ronaldo er einn af þessum leikmönnum. Hann gerir hluti og er með hreyfingar sem ég hef aldrei séð nokkurnn annan leikmenn gera," segir Charlton, en hann situr í stjórn Man. Utd.

Beckham segir að stuðningsmenn Man. Utd. eigi stóran þátt í velgengni Ronaldo í vetur. "Sá árangur sem hann hefur náð í vetur er magnaður, með tilliti til þess sem gerðist á HM í sumar. En þegar maður gengur inn á Old Trafford og áhorfendur syngja nafnið þitt, þá færðu stuðninginn sem þarf. Ég held að þessi stuðningur hafi gert hann að þeim leikmanni sem hann er í dag," segir Beckham.

"Ég hélt alltaf að hann yrði einn af bestu leikmönnum heims og mér finnst hann vera kominn ansi nálægt því núnal," bætti Beckham við.