Joe Cole ætlar að spila gegn Valencia

Enski miðjumaðurinn Joe Cole hefur lofað stjóra sínum Jose Mourinho að vera orðinn klár í slaginn þegar Chelsea mætir Valencia í Meistaradeild Evrópu í næsta mánuði. Cole hefur verið frá æfingum og keppni stærstan hluta tímabilsins vegna álagsmeiðsla í fæti og gekkst nýverið undir aðgerð til að fá bót meina sinna.

"Cole segir mér að ég muni geta notað hann gegn Valencia. Mér finnst það mjög gott þegar leikmenn setja sér svona markmið. Hann hefur gefið loforð og hann mun gera allt sem hann getur til að standa við það," sagði Mourinho.

"Cole var lykilmaður fyrir okkur á síðasta tímabili. Hann spilaði sitt besta ár á ferlinum. Við höfum saknað hans gríðarlega á þessu tímabili," bætti hann við.