Espanyol með annan fótinn í úrslitum

Spænska liðið Espanyol er komið með annan fótinn í úrslitaleik Evrópukeppni félagsliða eftir 3-0 sigur á þýska liðinu Bremen í fyrri viðureign liðanna í kvöld. Moises Hurtado kom heimamönnum yfir í fyrri hálfleik og Walter Pandiani og varamaðurinn Ferran Corominas tryggðu sigurinn í þeim síðari. Markvörðurinn Tim Wiese var rekinn af velli hjá Bremen eftir klukkutíma leik.

Í hinum undanúrslitaleiknum bar Osasuna sigurorð af löndum sínum í Sevilla 1-0 með skallamarki frá Roberto Soldado í síðari hálfleik. Sevilla er handhafi Evrópubikarsins og er í ágætri stöðu fyrir síðari leikinn í næstu viku þrátt fyrir tapið í kvöld - í leik þar sem leikmenn létu skapið gjarnan hlaupa með sig í gönur.