Royal Bank of Scotland býður í ABN Amro

Spænski bankinn Santander og belgíski bankinn Fortis undir forystu Royal Bank of Scotland hafa staðfest að þeir ætli að gera yfirtökutilboð í ABN Amro, stærsta banka Hollands. Bankarnir segja tilboð sitt mun betra en það sem breski bankinn Barclays hefur lagt fram. Ekkert hefur verið gefið uppi um fjárhæðina en til tals hefur komið að það geti hlaupið á 72,2 milljörðum evra, rúmlega 6.300 milljörðum íslenskra króna. Þrýsta þeir á stjórn ABN Amro að hún fjalli fljótlega um málið.

Til samanburðar hljóðar yfirtökutilboð Barclays 66 milljörðum evra, rétt tæpum 58.000 milljörðum króna.

Vilji virðist vera hjá hluthöfum að taka yfirtökutilboði bankanna þriggja en þeir hafa lagt til við stjórnina að hún taki hæsta tilboðinu.

Skilyrði fyrir kaupum Barclays á ABN Amro er sú að hollenski bankinn selji LaSalle, banka sinn í Bandaríkjunum. Verði það ekki raunin eru taldar líkur á að Barclays dragi tilboð sitt til baka.

Nokkur andstaða er gegn sölunni, sérstaklega hjá hópi hluthafa í ABN Amro sem kallað VEB en hann hefur höfðað mál gegn bankanum til að koma í veg fyrir að salan á LaSalle gangi í gegn.