Saviola útilokar að fara til Real Madrid

Framerjinn Javier Saviola hjá Barcelona segist aldrei muni gera stuðningsmönnum Barcelona þann grikk að ganga til liðs við erkifjendur liðsins Real Madrid. Hann segist súr yfir því að þurfa að yfirgefa herbúðir Spánarmeistaranna.

"Það er leiðinlegt þegar menn standa ekki við orð sín og að fá ekki nýjan samning eftir að manni er lofað því. Þegar litið er til þess hvað ég hef skorað mörg mörk fyrir Barcelona má sjá að ég hef staðið mig ágætlega hjá liðinu. Ég hef átt frábært samband við félaga mína í liðinu og stuðningsmennina og ef það er eitthvað sem ég mun minnast héðan - er það hve góðir stuðningsmennirnir voru við mig," sagði Saviola, sem aldrei hefur náð að festa sig í sessi undir stjórn Frank Rijkaard.

Hann segist aldrei ætla að ganga til liðs við Real Madrid, einmitt vegna þess hve gott samband hann á við stuðningsmenn Barcelona. Spænska blaðið Marca fullyrti að Real Madrid væri í viðræðum um að kaupa hann fyrir nokkrum dögum.