Hagnaður Carlsberg umfram væntingar

Danski bjórframleiðandinn Carlsberg, sem einnig framleiðir mjöð undir merkjum Tuborg, skilaði hagnaði upp á 45 milljónir danskra króna, jafnvirði 525,4 milljóna íslenskra króna, á fyrstu þremur mánuðum þessa árs. Þetta er umtalsvert betri afkoma en á sama tíma í fyrra en þá skilaði fyrirtækið tapi upp á 219 milljónir danskra króna, eða rúma 2,5 milljarða íslenskra króna.

Tekjur bjórframleiðandans námu 8,86 milljörðum danskra króna, 103,5 milljörðum íslenskra, sem er 14 prósentum meira en á sama tíma í fyrra. Þessu er að þakka mun betri bjórsölu í Evrópu og Rússlandi á tímabilinu sem jókst um 21 prósent á milli ára. Þetta er talsvert umfram væntingar.

Þrátt fyrir þetta hefur bjórsala dregist saman í Danmörku og Bretlandi á sama tíma, að sögn fyrirtækisins.

Svo bjartsýnir eru stjórnendur fyrirtækisins á að bjórsala eigi enn eftir að aukast að þeir telja horfnar á árinu afar góðar. Telur fyrirtækið nú líkur á að rekstrarhagnaður fyrirtækisins farið árið allt muni nema 4,5 milljörðum danskra króna, jafnvirði 52,5 milljörðum íslenskra króna, sem er rúmum tveimur milljörðum krónum betri afkoma en í fyrra. Þá er gert ráð fyrir að hagnaður fyrirtækisins muni nema að minnsta kosti tveimur milljörðum danskra króna, rúmir 23 milljarðar íslenskra króna.

Gengi bréfa í Carlsberg hækkaði um 5,5 prósent í kauphöllinni í Kaupmannahöfn í dag og stendur nú í 667 dönskum krónum á hlut.