Yukos heyrir sögunni til

Paran, tiltölulega lítt þekkt fyrirtæki keypti síðustu eignir rússneska orkufyrirtækisins Yukos á uppboði í Moskvu í Rússlandi í gær fyrir 100 milljarða rúblur, tæpan 251 milljarð íslenskra króna. Kaupin komu mjög á óvart enda bauð fyrirtæki fjórum sinnum hærra verð en fyrsta boð hljóðaði upp á.

Með sölu eignanna er fyrirtækjasögu Yukos, sem eitt sinn var eitt stærsta orkufyrirtæki Rússlands í einkaeigu, lokið. En með uppboðinu fengust fjármunir, sem notaðir verða til að greiða skattaskuld fyrirtækisins við rússneska ríkið upp á jafnvirði 1.666 milljarða íslenskra króna. Fyrrum forstjóri þess, Mikhail Khodorkovsky, var dæmdur vegna fjár- og skattsvika í forstjórastóli fyrirtækisins og situr nú af sér átta ára dóm í Síberíu.

Fastlega var gert ráð fyrir því að Rosneft, sem er að mestu í eigu rússneska ríkisins, keypti höfuðstöðvar Yukos í Moskvuborg. Fyrirtækið hefur allt frá því Yukos var lýst gjaldþrota í fyrra keypt upp allar eignir fyrirtækisins, nú síðast á fimmtudag þegar það festi sér síðustu framleiðsluvélar, tól, tæki og réttindi sem Yukos átti. Á sama uppboði keypti orkufyrirtækið Yuniteks 537 bensínstöðvar, sem Yukos hafði áður rekið.