Kínastjórn kælir markaðinn á ný

Gengi hlutabréfa á aðallista kauphallarinnar í Sjanghæ í Kína lækkaði um rúm átta prósent við lokun kauphallarinnar í Sjanghæ í dag. Ástæðan er ótti fjárfesta við að stjórnvöld þar í landi hækki skatta frekar með það fyrir augum að kæla hagkerfið.

Vísitalan rauf á dögunum 4.000 stiga múrinn. Við lækkunina nú, sem var upp á 330,34 punkta, endaði hún hins vegar í 3.670,40 stigum.

Þetta er önnur stóra lækkunin á tæpri viku. Þegar ríkisstjórn Kína ákvað að hækka stimpilgjöld á viðskipti með hlutabréf úr 0,1 prósenti í 0,3 prósent lækkaði gengi bréfa í kauphöllinni um sex prósent.

Fjárfestar óttast nú að Kínastjórn geri enn eina atlöguna að hlutabréfamarkaðnum og telja líkur á að fjármagnstekjuskattar verði hækkaðir til að kæla kínverska hagkerfið.

Breska ríkisútvarpið hefur eftir greinendum í dag að líklega muni lækkunin nú ekki hafa víðtæk áhrif enda verði hún tímabundin. Þá sé allt eins líklegt að aðgerðir stjórnvalda muni ekki skila þeim árangri sem þau leiti eftir.

Gengi hlutabréfa á aðallista kauphallarinnar í Sjanghæ í Kína hefur þrefaldast síðan í byrjun síðasta árs, þar af tvöfaldast það sem af er árs. Ástæðan eru mikil hlutabréfakaup í Kína. Varað hefur verið við því að bóla sé að myndast á markaðnum og geti hún sprungið með alvarlegum afleiðingum. Einn þeirra sem varað hefur við bólunni er Alan Greenspan, fyrrum aðalseðlabankastjóri Bandaríkjanna.