Sitja fyrir fjársjóðsleitarskipum

Spænsk herskip sitja nú fyrir tveim bandarískum fjársjóðsleitarskipum sem liggja í höfn á Gíbraltar. Spánverjar telja líklegt að 17 tonn af gull- og silfurpeningum sem fjársjóðsleitarmennirnir fundu hafi komið úr flaki af spænsku skipi. Þeir eigi því tilkall til fjársjóðsins.

Bandaríkjamennirnir segja að þeir hafi fundið flak skipsins á alþjóðlegu hafsvæði á Atlantshafi. Spánverjar trúa því ekki og telja flakið sé í Miðjarðarhafi, í spænskri lögsögu. Auk þess hafi skipið verið í þjónustu Spánverja þegar það sökk árið 1641.

Fjársjóðurinn hefur þegar verið fluttur flugleiðis til Bandaríkjanna. Fjársjóðsleitarmönnum er hinsvegar vandi á höndum þar sem þeir komast ekki frá Gíbraltar án þess að sigla um spænska lögsögu. Og þar bíða spænsk herskip eftir þeim.