Drekkti fósturdóttur fyrir tryggingafé

Bandarískur maður hefur verið handtekinn fyrir að drekkja þriggja ára gamalli fósturdóttur sinni. Þrem mánuðum áður hafði hann tryggt hana fyrir 200 þúsund dollara. Lögreglan í Seattle er sannfærð um að Joel Selmer hafi drekkt Ashley McLellan í sundlaug við hús þeirra síðastliðinn vetur.

Selmer segir að Ashley hafi sjálf opnað garðdyr seint um kvöld og farið að lauginni til þess að þvo sér um hendurnar. Hún hafi svo dottið útí. Þetta þykir ótrúverðugt þar sem hitastig var við frostmark og Ashley ákaflega myrkfælin.

Þá rennir það stoðum undir grunsemdir lögreglunnar að Selmer hefur áður orðið uppvís að því að taka saman við einstæðar mæður og þrýst á þær að tryggja börn sín. Hann hefur svo unnið þeim eitthvert mein og innheimt tryggingaféð. Ekki er þó vitað til þess að hann hafi áður framið morð.