Hamilton: Ég vissi að ég myndi vinna

Breski ökuþórinn Lewis Hamilton hefur svo sannarlega stolið senunni í Formúlu 1 í ár og vann sinn fyrsta sigur á ferlinum í Kanada um helgina. Hann er efstur í stigakeppni ökuþóra það sem af er og margir eru farnir að líkja hinum 22 ára gamla ökuþór við Tiger Woods vegna tilþrifa hans svo snemma á ferlinum.

"Það er langt síðan ég varð tilbúinn í slaginn og ég vissi að það væri bara spurning um hvar og hvenær - ekki hvort - ég næði mínum fyrstta sigri. Ég er bókstaflega á annari plánetu af gleði núna og þetta var sögulegur sigur. Næsti draumur minn er að verða heimsmeistari í Formúlu 1," sagði Hamilton í samtali við The Sun.

"Ég verð samt að vera raunsær og gera mér grein fyrir því að þetta er aðeins fyrsta tímabilið mitt og ég er bara nýliði ennþá. Það er erfitt að ná að gera sér grein fyrir öllu því sem á daga mína hefur drifið í fyrstu sex keppnunum. Fyrst það að komast að sem aðalökumaður, þá að komast á verðlaunapall í fyrstu keppnunum og enda á því að sigra núna. Ég hefði ekki trúað því fyrr en ég náði besta tímanum í tímatökunum á laugardaginn," sagði hinn efnilegi ökumaður.