Átti erfitt fyrsta tíma­bil en getur nú skrifað söguna

Þetta er aðeins annað tímabilið hans Kimi Antonelli í Formúlu 1 en hugarfar hans hefur breyst gríðarlega síðan þá. Á síðasta tímabili var lítið að ganga upp hjá honum og virtist það hafa mikil áhrif á unga Ítalann en hann hefur náð að snúa blaðinu við.

Toto Wolff, liðsstjóri Mercedes, rifjaði upp í viðtali við Sky Sports að eftir röð óheppilegra úrslita þá grét Antonelli eftir tímatökur fyrir belgíska kappaksturinn. Antonelli náði ekki að skora stig í níu keppnum í röð á bíl sem átti að berjast um verðlaunasæti. Það voru því ýmsar gagnrýnisraddir sem sögðu að Antonelli ætti ekki heima í Formúlu 1.

Eftir erfitt fyrsta tímabil ákvað Antonelli að breyta hugarfarinu sínu og einbeita sér meira að því að njóta í Formúlu 1. Það eru ekki margir sem fá tækifæri til þess að keppa í Formúlu 1 svo það er mikilvægt að njóta á meðan það er hægt.

Það hugarfar hefur virkilega hjálpað honum þar sem Mercedes er búið að vera með frábæran bíl á þessu tímabili. Antonelli hefur sannarlega nýtt sér það og virðist að öllum líkindum ná að verða heimsmeistari um helgina þegar mexíkóski kappaksturinn fer fram.