Dudek myndi sætta sig við tréverkið hjá Real

Pólski markvörðurinn Jerzy Dudek hjá Liverpool segir að tilhugsunin um að sitja á varamannabekk myndi ekki aftra sér í að ganga í raðir Real Madrid á Spáni ef svo færi að félagið vildi fá sig í sínar raðir. Það var einmitt seta hans á varamannabekknum sem gerði það að verkum að hann vildi fara frá Liverpool.

"Ég er upp með mér yfir því að vera orðaður við Real Madrid og ég er mjög spenntur yfir því að geta hugsanlega fengið tækifæri til að vinna með mönnum eins og Fabio Capello - sem hefur sagt að hann hafi áhuga á að fá mig til Real," sagði Dudek. Hann er með lausa samninga hjá Liverpool í sumar og talið var að hann vildi fara til félags þar sem hann gæti átt möguleika á byrjunarliðssæti.

"Ég veit hvaða hlutverk bíður mín ef ég fer til Real en sú staðreynd að ég hafi vakið áhuga slíks liðs er mikill heiður fyrir mig. Ég vona að hlutirnir fari að skýrast hjá mér fljótlega," sagði Pólverjinn.