Mugabe reiður út í spillt fyrirtæki

Robert Mugabe, forseti Zimbabwe, hótaði í morgun öllu illu gegn erlendum fyrirtækjum og námum í landinu. Mugabe segir mörg fyrirtækjanna vera spillt og segist hann ætla að þjóðnýta fyrirtækin ef að þau halda áfram að reyna að grafa undan honum.

Hann ásakar sum fyrirtækjanna um að skaða efnahag þjóðarinnar með of háum verðum og reyna þannig að koma stjórn sinni frá völdum. „Við munum gera námurnar upptækar og þjóðnýta fyrirtækin ef að þetta stoppar ekki," sagði hann reiður. „Við getum leikið óheiðarlega líka.“