Hamilton spenntur fyrir næstu helgi

Lewis Hamilton segir það vera frábæra tilfinningu að vita það að hann sé stigahæsti ökuþórinn á tímabilinu þegar hann tekur þátt í breska kappakstrinum í Silverstone um næstu helgi.

En draumar hans um að vinna í heimalandinu sínu gætu verið í hættu þar sem Ferrari liðið er komið á lagið eftir að Kimi Raikkonen og Felipe Massa náðu tveim efstu sætunum í Frakklandi í gær. Hamilton var þriðji í mark.

„Að keppa í fyrsta sinn í heimalandinu og vera stigahæstur ökuþóra, er besta tilfinning sem að ökuþór getur fundið," lét Hamilton hafa eftir sér. „Í byrjun tímabilsins bjóst ég aldrei við að ná svona góðum árangri, þannig að ég er mjög ánægður með þá frammistöðu sem ég hef sýnt," bætti hann við.