Alonso: Ég get náð Hamilton

Heimsmeistarinn Fernando Alonso segist vel geta náð félaga sínum Lewis Hamilton hjá McLaren í stigakeppni ökuþóra í Formúlu 1, þú breska ungstirnið hafi á hann 14 stiga forystu það sem af er mótinu.

"Ég er viss um að 14 stiga forysta hans mun hverfa fljótlega og það yrði frábært fyrir mig ef ég næði að saxa á forskot hans á hans eigin heimavelli á Silverstone um næstu helgi. Ef Hamilton vinnur á heimavelli verður það betra fyrir liðið, en það vildi að ég ynni sigur í Barcelona og á sama hátt vill það að hann vinni í Bretlandi," sagði Alonso, en hann hefur valdið nokkru fjaðrafoki í herbúðum McLaren með yfirlýsingum sínum í sumar.