Carlsberg yfir væntingum

Hagnaður danska bjórframleiðandans Carlsberg nam rétt rúmum einum milljarði danskra króna, jafnvirði 11,8 milljörðum íslenskra króna, á öðrum fjórðungi ársins. Þrátt fyrir samdrátt upp á 18 prósent á milli ára er afkoman yfir væntingum markaðsaðila.

Að sögn bandaríska viðskiptatímaritsins Fortune var gert ráð fyrir því að hagnaðurinn myndi nema 888 milljónum danskra króna, 10,5 milljörðum íslenskra.

Hagnaður fyrirtækisins á sama tíma í fyrra nam hins vegar 1,27 milljörðum danskra króna, jafnvirði rúmra 15 milljarða íslenskra króna. Ástæðan fyrir betri afkomu var sala á hlut í bjórfyrirtækinu Hite Brewery í S-Kóreu. Gjörningurinn skilaði Carlsberg hálfum milljarði danskra króna í vasann.

Tekjur Carlsberg námu rúmum 12,6 milljörðum danskra króna samanborið við 11,44 milljarða á sama tíma í fyrra.

Aukin sala á miðinum gyllta undir merkjum Carlsberg og Tuborg, sem fyrirtækið framleiðir sömuleiðis, í Evrópu og Kína er helsta ástæðan fyrir betri afkomu nú en í fyrra.

Forsvarsmenn Carlsberg eru hæstánægðir með árangurinn og gera ráð fyrir að minnsta kosti 2,2 milljarða danskra króna hagnaði á árinu öllu í uppfærðri spá sinni.