Hráolíuverð hækkar í verði

Heimsmarkaðsverð á hráolíu hækkaði á fjármálamarkaði í dag eftir að orkumálaráðuneyti Bandaríkjanna greindi frá því að hráolíu- og eldsneytisbirgðir landsins hefðu dregist meira saman en spáð hafði verið. Veðurspáin næstu vikur réð sömuleiðis nokkru um hækkunina en því er spáð að olíuvinnslustöðvum við Mexíkóflóa geti stafað hætta af hitabeltisstormum á næstunni.

Olíubirgðir drógust saman um 5,2 milljónir tunna á milli vikna í Bandaríkjunum en það er tæpum fimm milljónum tunnum meira en greinendur höfðu gert ráð fyrir.

Þá hefur eftirspurn eftir eldsneyti í sumar haldið olíuverði uppi í Bandaríkjunum en hún er 0,4 prósentum meiri nú en á sama tíma í fyrra.

Hitabeltisstormar eru tíðir á Mexíkóflóa um þetta leyti árs og munu tveir þeirra geta valdið tjóni á olíuvinnslustöðvum við flóann, að sögn fréttastofunnar Associated Press. Hitabeltisstormurinn Dean er enn sem komið er langt frá flóanum en gæti valdið usla síðar í vikunni. Annar stormur mun þó vera á leiðinni en óttast er að hann geti nálgast olíuvinnslustöðvar við flóann í fyrramálið, að sögn fréttastofunnar.

Hráolía sem verður afhent í næsta mánuði hækkaði um 90 sent á markaði í Bandaríkjunum og stendur nú í 73,28 dölum á tunnu. Verð á Brent Norðursjávarolíu hækkaði sömuleiðis um 87 sent á markaði í Bretlandi og stendur nú í 71,38 dölum á tunnu.