Ráðamenn ræða um fjármálamarkaðinn

Hlutabréfavísitölur lækkuðu lítillega við opnun fjármálamarkaða í Bandaríkjunum í dag eftir nokkrar sveiflur í gær. Á sama tíma hefur gengið sveiflast nokkuð á mörkuðum í Evrópu. Ben Bernanke, seðlabankastjóri Bandaríkjanna, og Henry Paulson, fjármálaráðherra landsins, funda í dag um hræringar á fjármálamarkaði.

Vísitölur í Bandaríkjunum hafa sveiflast nokkuð það sem af er vikunnar en það sem af er dags hafa þær allar staðið á rauðu og lækkað um 0,1 prósent.

Gengi vísitalna í Evrópu hefur sömuleiðis sveiflast nokkuð það sem af er dags. FTSE-vísitalan í Bretlandi hækkaði í morgun en hefur lækkað það eftir því sem á hefur liðið og hefur nú lækkað um rúm 0,3 prósent. Þýska Dax-vísitalan hefur sömuleiðis sveiflast úr mínus í plús. Sömu sögu er að segja af C20-vísitölunni í Kaupmannahöfn en hún hefur lækkað um 0,3 prósent.

Gert er ráð fyrir því að þeir Bernanke og Paulson, sem munu funda með formanni fjárlaganefndar öldungadeildarþingsins, muni ræða um frekari aðgerðir til að draga úr áhyggjum manna á fjármálamarkaði vegna samdráttar á fasteignalánamarkaði. Seðlabankinn hefur þegar veitt háum fjárhæðum inn í efnahagslífið til að draga úr áhrifunum auk þess að lækka daglánavexti til að minnka álag á millibankalán.

Breska ríkisútvarpið hefur eftir sérfræðingum á sviði fjármála að algjör óvissa ríki á markaðnum og afar erfitt að spá fyrir um þróun mála.