Óbreyttir stýrivextir í Japan

Japanski seðlabankinn ákvað í dag að halda stýrivöxtum óbreyttum í hálfu prósenti. Markaðsaðilar höfðu gert ráð fyrir þessari niðurstöðu í skugga óróa á alþjóðlegum fjármálamörkuðum upp á síðkastið. Hefði ekki komið til hræringa á markaði er líklegt að bankinn hefði hækkað vextina.

Einungis einn meðlimur peningamálanefndar bankans af níu var fylgjandi hækkun vaxtanna.

Í kjölfar efnahagslægðar sem gekk yfir Asíu fyrir áratug núllstillti seðlabanki Japans stýrivexti árið 2000 og hélt þeim óbreyttum þar til í júlí í fyrra en þá voru þeir hækkaðir um fjórðung úr prósenti.

Rökstuðningur bankastjórnarinnar fyrir ákvörðuninni er sú að vísbendingar eru upp i um að hátt olíuverð hafi haft neikvæðar afleiðingar fyrir innflutning til Japans. Þá er sömuleiðis reiknað með að samdráttur á fasteignalánamarkaði í Bandaríkjunum geti orðið til þess að neytendur vestanhafs haldi að sér höndum auk þess sem sterkt gengi jensins gagnvart Bandaríkjadal geti orðið til þess að dragi úr eftirspurn eftir japönskum vörum.