Dómsmálaráðherra Bandaríkjanna segir af sér

Alberto Gonzales, dómsmálaráðherra Bandaríkjanna hefur sagt af sér. Gonzales hefur legið undir miklu ámæli síðan hann rak átta opinbera saksóknara úr starfi á síðasta ári. Hann var einnig gagnrýndur harðlega fyrir að styðja heimildarlausar njósnir forsetans innanlands.

Gonzales er nákominn Bush forseta. Hann byrjaði að starfa fyrir forsetann meðan hann var ennþá ríkisstjóri í Texas. Hann var einn af lögfræðingum Hvíta hússins á fyrsta kjörtímabili Georges Bush og fyrsti spænsk ættaði dómsmálaráðherra landsins.