Vöxtur í smásöluverslun undir spám

Smásöluverslun í Bandaríkjunum jókst um 0,3 prósent á milli mánaða í ágúst, samkvæmt nýbirtum tölum bandaríska viðskiptaráðuneytisins. Til samanburðar nemur aukningin 0,5 prósentum í júlí. Þetta er nokkru undir væntingum greinenda, sem telja að samdráttur á fasteignamarkaði vestanhafs hafi snert meira við einkaneyslu en talið hefur verið.

Fréttaveita Bloomberg segir lægra fasteignaverð í kjölfar samdráttar á fasteignamarkaði vestra, hærri vaxtakostnaður og færri nýráðningar en gert var ráð fyrir hafa skilað sér í minni einkaneyslu nú en áður. Einkaneyslutölur eru stór liður í hagtölum og megi því gera ráð fyrir að hægi á hagvexti í kjölfarið.

Bloomberg segir þetta gefa seðlabanka Bandaríkjanna enn frekar tilefni til að lækka stýrivexti á vaxtaákvörðunarfundi bankans á þriðjudag. Ekki liggur fyrir hve mikil lækkunin gæti orðið en greinendur telja að í ljósi óróleika á fjármálamörkuðum geti stýrivextir farið niður í Bandaríkjunum um allt að 50 punkta.