Dennis gaf Raikkönen titilinn á silfurfati

Formúlumógúllinn Bernie Ecclestone hefur aldrei hikað við að segja skoðanir sínar og í samtali við Daily Mail í dag segir hann að liðsstjóri McLaren hafi gefið Kimi Raikkönen hjá Ferrari titilinn með því að klúðra skipulagi liðsins í lokakeppninni.

Hamilton var með pálmann í höndunum fyrir lokakeppnina í Brasilíu en féll niður í 18. sæti snemma í keppninni eftir vandræði í gírkassa bílsins. Hann náði með mikilli baráttu að vinna sig í sjöunda sætið en það dugði skammt. Ecclestone segir að liðsstjórinn hafi klúðrað málinu.

"Ron færði Raikkönen titilinn á silfurfati með því að breyta hjá sér keppnisáætluninni sem venjulega hefur í för með sér tvö viðgerðahlé. Hann tapaði 25 sekúndum í viðgerðarhléunum í stað þess að þurfa venjulega aðeins 15 sekúndur og þess vegna er Kimi heimsmeistari. Ég vona bara að hann fari að tala aðeins meira," sagði Ecclestone hæðnislega, en Finninn er ekki sérstaklega málglaður eins og menn vita og þykir ekki sérstaklega fjölmiðlavænn fyrir vikið.