Pundið nálægt hæstu hæðum gagnvart bandaríkjadal

Gengi breska sterlingpundsins fór í hæstu hæðir gagnvart bandaríkjadal á mörkuðum í dag en 2,066 dalir fengust fyrir hvert pund. Dollarinn hefur ekki verið ódýrari síðan um mitt sumar árið 1981.

Sögulegur gengismunur var á milli myntanna síðla árs 1980 þegar 2,446 dalir fengust fyrir hvert pund.

Að sögn breska ríkisútvarpsins er tvennt sem leiddi til gengismunarins. Bæði hefur gengi bandaríkjadals lækkað gagnvart öðrum gjaldmiðlum eftir því sem styst hefur í stýrivaxtadag vestanhafs auk þess sem breska pundið styrktist eftir að Englandsbanki, seðlabanki Bretlandseyja, sagðist ekki ætla að lækka stýrivexti í næstu viku líkt og vonir stóðu til.

Stýrivextir í Bretlandi standa nú í 5,75 prósentum.