Létt hjá Börsungum

Thierry Henry og Ronaldinho voru á skotskónum í dag er Barcelona lagði Real Betis, 2-0. Eiður Smári Guðjohnsen fékk að spreyta sig síðustu mínútur leiksins.

Ronaldinho, Messi og Henry voru allir í byrjunarliði Barcelona en Eiður Smári var á bekknum sem fyrr segir.

Börsungar byrjuðu mun betur í leiknum og strax á áttundu mínútu mátti minnstu mun að fyrsta mark leiksins kæmi.

Ronaldinho á sendingu frá vinstri og Juanito, varnarmaður Betis, missir einfaldlega af boltanum þegar hann ætlar að hreinsa í burtu. Messi er í kjölfarið í dauðfæri en Ricardo varði afar vel.

Skömmu síðar átti Ronaldinho sjálfur skot að marki eftir góðan samleik við Andrés Iniesta en boltinn hafnaði í hliðarnetinu.

Á fimmtándu mínútu átti svo Henry skalla að marki eftir fyrigjöf Messi en Ricardo er aftur vel á verði.

Á 22. mínútu átti svo Henry góðan sprett í framlínunni en hann fékk sendingu inn fyrir vörn Betis frá Xavi. Gott skot hans hafnar hins vegar í stönginni.

Ótrúleg byrjun á leiknum hjá Börsungum og var það með hreinum ólíkindum að liðið hafi ekki nýtt sér eitt af þeim færum sem liðið fékk í upphafi leiksins.

En ísinn brotnaði loksins á 33. mínútu. Iniesta átti góða sendingu á Henry sem gerði allt hárrétt og skilaði knettinum í netið, framhjá Ricardo markverði.

Þetta var fimmta mark Henry í deildinni til þessa en eftir markið drógu Börsungar aðeins úr sóknarkrafti sínum. Þeir héldu boltanum vel á miðjunni og gáfu Betis-mönnum fá færi á sér.

Staðan var því 1-0 í hálfleik en yfirburðir Barcelona algerir. Það sést best á því að í fyrri hálfleik var með liðið með boltann í um 70% leiktímans.

Börsungar héldu uppteknum hætti í síðari hálfleik og strax á 53. mínútu skoraði Ronaldinho glæsilegt mark.

Það kom beint úr aukaspyrnu sem var rétt utan vítateigs. Ronaldinho tók spyrnuna innanfótar og skilaði knettinum í nærhornið. Þetta var fjórða markið hans í deildinni til þessa.

Á 61. mínútu fékk Henry enn eitt færið en hann missti ótrúlega nokk af sendingu Eric Abidal frá vinstri. Boltinn lak einfaldlega framhjá honum sem og varnarmönnum Betis.

Ronaldinho átti svo skot rétt framhjá marki Betis úr aukaspyrnu nokkrum mínútum síðar.

Á 70. mínútu áttu Börsungar enn eina dauðafærið í leiknum. Í þetta sinn var það Lionel Messi sem spænir vörn Betis í sig og kemst í góða skotstöðu en skot hans er rétt svo framhjá.

Ronaldinho reyndi svo bakfallsspyrnu fimm mínútum síðar en uppskar ekkert annað en sára öxl þar sem hann lenti afar illa. Hann jafnaði sig þó fljótlega og gat haldið áfram.

Eiður Smári Guðjohnsen fékk svo að spreyta sig síðustu sjö mínútur leiksins er hann kom inn á sem varamaður fyrir Xavi.

Ronaldinho bætti svo við þriðja markinu í uppbótartíma og aftur úr aukaspyrnu. Boltinn fór undir varnarvegginn og í nærstöngina og inn. Ricardo trúði vart eigin augum.

Sjö marka leikur

Villarreal og Barcelona eru nú jöfn með 24 stig í öðru sæti deildarinnar, einu stigi á eftir Real Madrid.

Villarreal vann ótrúlegan sigur á Atletico Madrid á útivelli fyrr í dag í sjö marka leik.

Pablo og Simao komu heimamönnum í 2-0 en þeir Guiseppe Rossi og Fabrizio Fuentes jöfnuðu metin fyrir Villarreal og þannig stóðu leikar í hálfleik.

Aguero kom heimamönnum aftur yfir en Tyrkinn Nihat Kahveci reyndist hetja Villarreal. Hann hafði komið inn á í hálfleik fyrir Rossi og skoraði tvívegis í seinni hálfleik, þar af sigurmarkið á 90. mínútu leiksins eftir undirbúning Cani.

Til að bæta gráu á svart brenndi Maxi Rodriguez af vítaspyrnu snemma í síðari hálfleik fyrir Atletico.

Úrslit annarra leikja í dag:

Levante - Almeria 3-0

Real Murcia - Deportivo 0-2

Osasuna - Getafe 0-2

Racing - Espanyol 1-1

Real Zaragoza - Valladolid 2-3