Vonar að Messi verði með kvef um helgina

Michael Laudrup, þjálfari Getafe á Spáni, sló á létta strengi á blaðamannafundi fyrir leik liðsins gegn Barcelona um helgina.

Daninn segir að þeir Iniesta og Messi hafi verið algjörir lykilmenn í liði Barcelona það sem af er leiktíðar og á ekki von á auðveldum leik.

"Það eru allir að tala um Ronaldinho og Xavi og Puyol, en í mínum augum eru það Iniesta og Messi sem hafa borið liðið uppi í haust. Við verðum bara að sjá hvort þeir verði ekki með kvef á laugardaginn," sagði Laudrup glettinn á blaðamannafundinum.