Hatton gerir sig heimakominn í Vegas

Breski hnefaleikarinn Ricky Hatton hefur nú komið sér vel fyrir í íbúð sem hann tók sér á leigu í Las Vegas, rúmum hálfum mánuði fyrir risabardaga sinn við Floyd Mayweather þar í borg.

Hatton tók þá ákvörðun að finna sér íbúð að þessu sinni því í síðustu heimsókn sinni til Nevada-fylkis fékk hann kvef þegar hann gisti á hóteli. Þetta er þriðja heimsókn Hatton til höfuðborgar hnefaleikanna.

"Húsið sem ég fékk er frábært og mér líður strax eins og heima hjá mér," sagði Hatton sem hefur með sér einkakokk sem mallar ofan í hann fæði fram að bardaganum þann 8. desember.

Í gærkvöldi sýndi sjónvarpsstöðin Sýn fyrsta þáttinn í seríunni 24-7 þar sem farið er yfir undirbúning þeirra Hatton og Mayweather fyrir bardagann, sem sýndur verður beint á Sýn í næsta mánuði.