Slæmur hringur hjá Birgi Leifi í Suður-Afríku

Birgir Leifur Hafþórsson lék á sjö höggum yfir pari á fyrsta hringnum á Meistaramóti Alfred Dunhill í Suður-Afríku.

Hann var á níu höggum yfir pari þegar tvær holur voru eftir á hringnum en hann náði að fá fugla á bæði sautjándu og átjándu holu.

Hann fékk þrjá skramba í dag, á þeirri fyrstu, þrettándu og fjórtándu. Þar að auki fékk hann fimm skolla, sex pör og fjóra fugla.

Eins og má ráða af þessu var leikur Birgis Leifs afar óstöðugur í dag en hann sýndi með sínum fjórum fuglum í dag að hann á talsvert mikið inni.

Hann er meðal neðstu manna á mótinu, í 130.-137. sæti. Hann þarf að bæta sig talsvert mikið á morgun ef hann ætlar sér að komast í gegnum niðurskurðinn.

Sion Beeb frá Wales er í efsta sæti mótsins eftir fyrsta hringinn en hann lék á 67 höggum í dag. Ernie Els er í 7.-14. sæti á tveimur höggum undir pari og Darren Clarke frá Norður-Írlandi í 36.-52. sæti á einu höggi yfir pari.