Ekki útilokað að Eiður fari frá Barcelona í janúar

Arnór Guðjohnsen, faðir og umboðsmaður Eiðs Smára Guðjohnsen hjá Barcelona, lét hafa það eftir sér í útvarpsviðtali á Spáni að ekki væri útilokað að Eiður færi frá félaginu í janúarglugganum.

Eiður var úti í kuldanum hjá liðnu þangað til meiðsli færðu honum tækifæri á ný, en með endurkomu manna eins og Ronaldinho, Deco og Samuel Eto´o, þykir ljóst að tækifærum Eiðs mun fækka verulega.

Arnór sagði í útvarpsviðtalinu að þeir feðgar héldu öllum möguleikum opnum því hlutirnir væru ekki lengi að breytast í knattspyrnunni eins og hefði sýnt sig á þessu tímabili. Eiður var meiddur í upphafi leiktíðar en fékk svo að spreyta sig eftir að nokkrir félaga hans lentu á meiðslalistanum.